संविधान र लोकतान्त्रिक मूल्य-मान्यता विपरीत गरिने कुनै पनि गतिविधि अस्वीकार्य र अक्षम्य हुने ६ राजनीतिक दलका युवा संगठनहरूले बताएका छन्।
काठमाडौंको तीनकुने, कोटेश्वर, जडिबुटी लगायतका क्षेत्रमा शुक्रबार राजावादी समूहबाट भएको हिंसात्मक प्रदर्शनको निन्दा गर्दै उनीहरूले उक्त कुरा बताएका हुन्।
नेपाल तरूण दल, राष्ट्रिय युवा संघ नेपाल, योङ कम्युनिस्ट लिग नेपाल, युवा संघ नेपाल, युवा संगठन नेपाल र नेपाल समाजवादी युवा संघले संयुक्त विज्ञप्ति जारी गर्दै भनेका छन्, 'देश शान्ति र समृद्धिको दिशातर्फ गइरहेको वर्तमान सन्दर्भमा प्रतिगमनका नाममा मुलुकलाई उल्टो बाटोतर्फ लैजाने गरी आपराधिक तवरले सार्वजनिक सम्पत्ति, सवारी साधन, सञ्चार गृह तोडफोड एवं सुपर मार्केटमा लुटपाट मच्चाएर समाजलाई आतंक सिर्जना गरिएको छ।'
'नेपाली जनताले बलिदानपूर्ण संघर्षबाट प्राप्त गरेको संघीय लोकतान्त्रिक गणतन्त्रलाई कमजोर पार्ने कुनै पनि गतिविधि लोकतन्त्रका हिमायती युवाशक्तिले कदापि स्वीकार गर्न सक्दैनन्,' विज्ञप्तिमा भनिएको छ, 'हामी गणतन्त्रका लागि लड्ने राजनीतिक दलका युवा संगठनहरू स्पष्ट रूपमा चेतावनी दिन चाहन्छौं- संविधान र लोकतान्त्रिक मूल्य-मान्यता विपरीत गरिने कुनै पनि गतिविधि अस्वीकार्य र अक्षम्य हुनेछ।'
'हामी नेपाल सरकालाई आग्रह गर्छौं, संविधान विपरीतका गतिविधि गर्ने, समाजमा विखण्डन ल्याउने, हिंसा भड्काउने तथा गणतन्त्र विरोधी षड्यन्त्र गर्ने कुनै पनि समूह वा व्यक्तिलाई यथाशिघ्र कानुनी दायरामा ल्याइयोस्। साथै, सम्पूर्ण आम नागरिकलाई लोकतान्त्रिक प्रणाली अझै समृद्ध गर्न, कमी-कमजोरी सच्याउन, खबरदारी गर्न, सामाजिक स्थायित्व र समृद्धिका लागि व्यवस्था विरूद्ध हुने यस्ता अपराधजन्य कार्यप्रति सचेत रहन आह्वान गर्छौं,' विज्ञप्तिमा भनिएको छ।
उनीहरूले संघीय लोकतान्त्रिक गणतन्त्र कुनै पनि प्रतिगामी शक्तिको षड्यन्त्रबाट नढल्ने पनि बताएका छन्। संघीय लोकतान्त्रिक गणतन्त्रको रक्षार्थ यस्ता अपराधजन्य गतिविधि कायम रहेमा कडा प्रतिरोध गर्ने चेतावनी पनि दिएका छन्।
-1743161432.jpg)
-1746009348.jpg)
